Dey Goin Set Jesus Up
(Matthew 26:1-5, 14-16; Mark 14:1-2, 10-11; John 11:45-53)
221Da time wen come fo da Passova, an da spesho religious time dey call Da Bread Dat No Mo Yeast time. 2Da main pries guys an da teachas dat teach God's Rules wen tink plenny how dey can kill Jesus. But dey scared da peopo.
Judas Goin Sell Out Jesus
3Den da Devil wen take ova Judas Iscariot, one a Jesus twelve guys. 4So Judas wen go talk to da main pries guys, an da officers fo da temple, fo see how he goin set Jesus up. 5Da main pries dem wen feel real good inside, an dey say dey goin give Judas money fo do um. 6Judas like da deal, so he look fo one chance fo set Jesus up fo dem so nobody know.
Jesus Goin Eat Da Passova Food
(Matthew 26:17-25; Mark 14:12-21; John 13:21-30)
7Da day fo da Bread Dat No Mo Yeast come, wen dey kill da baby sheep fo da Passova sacrifice. 8Jesus send Peter an John. He say, “Go make ready da Passova food fo us eat.”
9Dey say, “Wea you like us make um ready?”
10Jesus say, “You know, wen you guys go inside town, one guy goin come dat carry one water jug. Go wit him inside one house, 11an tell da guy dat own da house, “Da Teacha say, ‘Wea da room me an my guys goin eat da Passova food?’ 12He goin show you guys one big room upstairs, dat get everyting. Make da food ready dea.”
13Da guys wen go an dey wen find everyting jalike Jesus wen say. An dey make da Passova food.
Da Dinna Wit Da Boss
(Matthew 26:26-30; Mark 14:22-26; 1 Corint 11:23-25)
14Wen da time come, Jesus wen sit down at da table wit da guys he goin send all ova bumbye. 15He tell um, “I tinking plenny bout dis. I really like eat dis Passova food wit you guys befo I suffa. 16Fo shua, afta dat, I no goin eat um again till God da King come an take ova.”
17Den Jesus take da cup, an tell God “Mahalo” an say, “Take dis an pass um down to da oddas. 18Fo shua, I no goin drink notting from da grape plant again till da day God da King come an take ova.”
19Den he take da bread, an tell God “Mahalo,” an broke um, an give um to dem. He say, “Dis hea, my body dat I give up fo you guys. From now, tink bout me everytime you eat dis.” 20Same ting, afta da food he take da cup an say, “Dis cup, da new deal I goin make wit my blood dat I goin pour out fo you guys wen I mahke. 21But you know, da guy dat goin set me up stay hea wit me at da table. 22I da Guy Dass Fo Real, an I goin mahke jalike God wen say, but auwe da guy dat goin set me up!” 23An da guys aks each odda, “Who da guy goin do dat?”
Da Guys Talk Bout Who Da Main Guy
(Matthew 20:24-48; Mark 10:41-45)
24Da guys stay talking wit each odda. Dey say, “Wat one a us guys you tink goin be da main guy?” 25Jesus say, “Da kings fo da diffren peopos, dey boss aroun dea peopo. Dey da guys dat run da peopo, an everybody say da kings good guys cuz dey stay helping dea peopo. 26But you guys, no be lidat. Wit you guys, da main guy gotta be jalike one small kid, an da boss gotta be da one dat work fo all da oddas. 27Who you guys tink da main guy? Da guy dat stay sit by da table o da guy dat bring him da food? You tink da guy dat sit by da table? But me, I not lidat. You know, I stay wit you guys, but I work fo you guys.
28You da guys dat wen stick wit me wen I suffa plenny. 29I goin make you guys come kings jalike my Fadda wen make me one king. 30You guys goin eat an drink by my table wen I come King, an you guys goin sit down on top thrones, an come judges fo da twelve Israel ohanas.”
Peter Goin Say He Donno Jesus
(Matthew 26:31-35; Mark 14:27-31; John 13:36-38; Isaiah 53:12)
31Den Jesus tell Peter, “Eh, Peter, lissen! Da Devil wen aks God if he can give all you guys one big test. Jalike one farma guy take da junk outa da wheat, da Devil like find out who fo real an who not. 32But I wen aks God fo help you, Peter, so you trus God an no give up. Afta you come sorry an come back by me, kokua yoa bruddas.”
33But Peter say, “Boss, I stay ready fo go jail an mahke wit you.” 34Jesus say, “I tell you, Peter, befo da roosta make noise early today, three times you goin say dat you donno who me.”
Da Money Bag, Da Clothes Bag, An Da Sword
35Den Jesus tell dem, “Wen I wen send you guys out befo, an you no mo money bag, o bag fo yoa clotheses, o slippas, you wen need anyting moa?
Dey say, “No.”
36Jesus say, “But now, whoeva get one money bag o one bag fo clotheses, take um. An da guy dat no mo sword, good he sell his coat fo buy one sword. 37Cuz I telling you, da place inside da Bible dat say, ‘Dey wen put him wit da crooks,’ dass da way gotta happen to me. Wat da Bible wen say bout me befo time, everyting stay happen jus lidat.” 38Dey say, “Boss, get two swords ova hea awready.” He tell um, “Dass nuff.”
Olive Ridge
(Matthew 26:36-46; Mark 14:43-50; John 18:3-11)
39Jesus go Olive Ridge, jalike he everytime do. His guys go too. 40Wen dey come dea, he tell um, “Aks God fo help you guys so you no do bad kine stuff wen get chance.”
41Den he go litto bit mo down by himself, go down on his knees, an aks God fo help him 42like dis: “Fadda, if you like, no let me suffa lidis. But gotta be da way you like, not da way I like.” 43[One angel guy from da Boss Up Dea Inside Da Sky show up by Jesus an kokua him. 44Jesus suffa plenny, an pray mo hard. He sweat jalike big drops blood dat falling down on top da groun.]
45Wen Jesus pau pray, he stand up an go back by his guys, an find dem all sleeping. Dey worn out, cuz dey sad. 46He tell dem, “How come you guys sleeping? Get up an aks God fo help you guys no do bad kine stuff wen get chance.”
Dey Bus Jesus
(Matthew 26:47-56; Mark 14:43-50; John 18:3-11)
47Wen Jesus still talking, plenny peopo come ova dea. Judas, one a Jesus twelve guys, he wen bring dem. He come by Jesus fo kiss him. 48But Jesus tell him, “Judas, I da Guy Dass Fo Real. Wot! You goin set me up wit one kiss?!”
49Wen Jesus guys figga wat goin happen, dey say, “Boss, you like us hit dem wit our swords?” 50Den one a dem wen go afta da guy dat work fo da Head Priest, an cut his right ear off.
51But Jesus say, “No do dat no moa!” An he wen touch da guy's ear an make him come good.
52Den Jesus tell da main pries guys, da captains fo da temple guards, an da older leadas dat come ova dea fo take him, “You guys tink I one crook o wat? Why you guys tink you gotta come ova hea wit swords an clubs fo bus me? 53Every day I wen stay inside da temple yard wit you guys, an you guys neva bus me. But dis yoa time. Dis da dark time, wen da Bad Guy, da Devil, get power fo do his stuff.”
Peter Say He Donno Jesus
(Matthew 26:57-58, 69-75; Mark 14:53-54, 66-72; John 18:12-18, 25-27)
54Afta dey bus Jesus, dey take him away inside da Head Priest guy's house. Peter go too, but he stay far. 55Dey make one fire inside da yard, an sit down by um togedda. Peter sit down wit dem. 56One worka girl spock Peter sitting dea by da fire. She look strait at him, an tell da odda guys, “Dis guy was wit Jesus!”
57But Peter say, “No way, girl! I donno da guy!”
58Bumbye one guy spock Peter an he say, “You one a dem too!”
But Peter say, “No way, brah!”
59Bout one hour lata anodda guy say, “Fo shua dis guy stay wit Jesus, cuz he come from Galilee.”
60But Peter wen say, “Eh, brah, I donno wat you talking bout!” Peter still talking, an da roosta wen make noise. 61Da Boss Jesus wen turn an look at Peter. Den Peter rememba wat da Boss wen tell him, “Befo da roosta make noise tonite, you goin say three times you donno me.” 62Den Peter go outside an bus out crying.
Dey Make Fun A Jesus An Bus Um Up
(Matthew 26:67-68; Mark 14:65)
63Da guards make fun a Jesus an bus um up. 64Dey cover his eyes wit one rag, an give um plenny false crack, an tell him, “Eh, you one talka fo God, yeah? So, tell us who wen hit you!” 65An dey talk any kine to him.
Jesus In Front Da Main Leada Guys
(Songs 110:1)
66Wen da sun come up, da older leadas fo da peopo, da main pries guys, an da teachas dat teach God's Rules come togedda, an bring Jesus in front dem. 67Dey say, “If you da Spesho Guy God Wen Send fo real kine, tell us.”
Jesus tell dem, “If I tell you guys, you no goin believe me. 68An if I aks you guys one question you no goin tell me. 69I da Guy Dass Fo Real. Afta dis I goin sit down da importan place by God's right side. He da One dat get all da power.”
70Dey all aks, “So you God's Boy?”
He tell dem, “Dass right, wat you guys say.”
71Den dey say, “No need mo guys fo talk agains him! We jus wen hear wat he say!”