John Da Baptiza Teach Da Peopo
(Matthew 3:1-12; Mark 1:1-8; John 1:19-28; Isaiah 40:3-5)
31Afta da Big King Tiberius was king fo Rome fifteen years, Pontius Pilate da territorial governa from Rome fo Judea, Herod da small kine king inside Galilee, Herod's brudda Philip da small kine king inside Iturea an Trakonitis, Lysanias da small kine king inside Abilene, 2an Annas an Kaiafas da main pries guys fo da Jewish peopo; dat time da guy John, Zekariah's boy, he wen stay ova dea inside da boonies. Den God wen talk to him. 3So he wen go all ova da place aroun da Jordan River, an tell da peopo, “You guys, you gotta come sorry an pau do all da bad kine stuff you stay doing now, an no do um no moa, an get baptize. Den God goin let all you guys go an hemo yoa shame fo all da bad kine stuff you doing.” 4Dass jalike Isaiah wen tell. He one guy who wen talk fo God befo time. He wen write down dis inside da Bible:
“One guy goin talk real loud inside da boonies,
‘Eh! Make da road ready fo da Boss!
Make um strait fo him!’
5Every valley, dey goin fill um up,
Every mountain an hill, dey goin make um flat.
Da crooked roads, dey goin make um strait,
An da rough kine place, dey goin make um nice.
6An all da peopo inside da whole world
Goin see dat God goin take us
Outa da bad kine stuff we stay in.”
7Plenny peopo wen go ova dea so John can baptize um. He wen tell, “Eh! You guys no good, jalike one snake ohana! Who wen tell you guys fo run away from da bad tings dat goin happen? Cuz God no goin take all da bad kine stuff you do. He goin punish you guys fo dat! 8Jalike one fruit tree give same kine fruit, you guys gotta do da kine good stuff dat show dat you pau do all da kine bad stuff you doing, an no do um no moa. Eh! No start fo tell yoaself, ‘Us guys can do wat we like, cuz we get Abraham fo our main fadda.’ I telling you guys now, God can take dese rocks ova hea an make kids fo Abraham outa dem. 9You guys gotta do good kine stuff! Cuz jalike awready get one guy wit one ax, all ready fo cut da tree roots. All da trees dat no make good fruit, he goin cut um down, an throw um inside da fire.”
10Da peopo wen say, “Den wat we gotta do?”
11John tell, “Da guy dat get two coats gotta give one to da guy dat no mo coat. An da guy dat get food gotta give to da guy dat no mo food.”
12Some guys dat collect money fo tax fo da govermen wen come so John can baptize dem too. An dey aks him, “Teacha, wat we gotta do?”
13He wen tell um, “No take mo money den you suppose to.”
14Some army guys wen aks him, “An wat we gotta do?”
He wen tell, “No push nobody fo give you guys money, an no blame nobody fo someting dey neva do. Stay good inside wit da kine pay you get.”
15Da peopo stay waiting fo da Spesho Guy God Goin Send, an dey wen tink plenny inside dea hearts if John dat guy. 16John wen tell, “I baptizing you guys wit water. Dat goin show dat you stay sorry fo all da kine bad stuff you do. But afta me, goin come one nodda guy, da Christ guy. He way mo importan den me. An you know wat? I not big nuff fo help him hemo his slippas from his feets. Da way he goin baptize you guys, jalike he goin give you God's Spirit fo take ova you, jalike he goin baptize you guys wit fire. 17Dat mean, da Christ guy goin punish da peopo dat stay do bad kine stuff. Jalike one farma guy put da wheat grain inside da basket an let da wind blow out all da junk kine stuff from da grain, den he put da wheat inside da storage place. Afta dat, he burn da junk kine stuff. Dat mean, da Christ guy goin punish da peopo dat stay do bad kine stuff, jalike he throw um inside da fire dat no goin pio eva.”
18John wen tell da peopo plenny mo stuff so dey can trus da Good Stuff From God he stay telling dem. 19But John wen scold Herod da small kine king ova dea, cuz Herod wen steal his own brudda's wife Herodias, an marry her. He wen do plenny mo bad kine stuff too. 20An one ting mo worse, bumbye Herod goin throw John inside da prison.
John Baptize Jesus
(Matthew 3:13-17; Mark 1:9-11)
21Had one time, John wen baptize all da peopo, an he baptize Jesus too. Afta John baptize Jesus an Jesus stay praying, da sky wen open 22an God's Spesho Spirit wen come down on top Jesus. Can see da Spirit dat time, look jalike one dove. An wow! Had one voice from da sky wen say, “You my Boy. I really get love an aloha fo you, an I stay good inside cuz a you.”
Jesus Ohana
(Matthew 1:1-17)
23Wen Jesus wen start fo teach, he was bout thirty years old. Da peopo wen tink he Joseph's boy. Joseph, he Heli's boy; 24Heli, he Mattat's boy; Mattat, he Levi's boy; Levi, he Melki's boy; Melki, he Jannai's boy; Jannai, he Joseph's boy; 25Joseph, he Mattatias boy; Mattatias, he Amos boy; Amos, he Nahum's boy; Nahum, he Esli's boy; Esli, he Naggai's boy; 26Naggai, he Maat's boy; Maat, he Mattatias' boy; Mattatias, he Semein's boy; Semein, he Josek's boy; Josek, he Joda's boy; 27Joda, he Joanan's boy; Joanan, he Resa's boy; Resa, he Zerubbabel's boy; Zerubbabel, he Shealtiel's boy; Shealtiel, he Neri's boy; 28Neri, he Melki's boy; Melki, he Addi's boy; Addi, he Cosam's boy; Cosam, he Elmadam's boy; Elmadam, he Er's boy; 29Er, he Joshua's boy; Joshua, he Eliezer's boy; Eliezer, he Jorim's boy; Jorim, he Mattat's boy; Mattat, he Levi's boy; 30Levi, he Simeon's boy; Simeon, he Judah's boy; Judah, he Joseph's boy; Joseph, he Jonam's boy; Jonam, he Eliakim's boy; 31Eliakim, he Melea's boy; Melea, he Menna's boy; Menna, he Mattata's boy; Mattata, he Nathan's boy; Nathan, he David's boy; 32David, he Jesse's boy; Jesse, he Obed's boy; Obed, he Boaz boy; Boaz, he Salmon's boy; Salmon, he Nashon's boy; 33Nashon, he Aminadab's boy; Aminadab, he Admin's boy; Admin, he Arni's boy; Arni, he Hezron's boy; Hezron, he Perez' boy; Perez, he Judah's boy; 34Judah, he Jacob's boy; Jacob, he Isaac's boy; Isaac, he Abraham's boy; Abraham, he Terah's boy; Terah, he Nahor's boy; 35Nahor, he Serug's boy; Serug, he Reu's boy; Reu, he Peleg's boy; Peleg, he Eber's boy; Eber, he Shelah's boy; 36Shelah, he Cainan's boy; Cainan, he Arfaxad's boy; Arfaxad, he Shem's boy; Shem, he Noah's boy; Noah, he Lamek's boy; 37Lamek, he Metuselah's boy; Metuselah, he Enok's boy; Enok, he Jared's boy; Jared, he Mahalaleel's boy; Mahalaleel, he Cainan's boy; 38Cainan, he Enos boy; Enos, he Seth's boy; Seth, he Adam's boy; Adam, he God's boy.