Da Devil Try Make Jesus Do Bad Kine Stuff
(Matthew 4:1-11; Mark 1:12-13; Rules 6:13, 8:3; Songs 91:11-12)
41Afta John wen baptize Jesus, Jesus wen go way from da Jordan River. God's Spesho Spirit stay in charge a him, an God's Spirit wen take him to da boonies. 2Fo forty days da Devil wen try presha Jesus fo do bad kine stuff. Jesus neva eat notting dat time, an afta dat he hungry.
3Da Devil tell him, “So, wat? You God's Boy fo real kine? Den tell dis rock fo come bread.”
4Jesus wen say, “Da Bible say, ‘No mo nobody dat can live ony on bread.’-”
5Den da Devil take him up on top one high place, an show him all da diffren countries all ova da world in one second. 6An da Devil tell him, “All dis power an awesome stuff, dass mines, an I can give um to anybody I like. 7I give you all dis, if you go down on yoa knees an give me plenny respeck.”
8Jesus tell him, “Da Bible say,
‘Gotta go down on yoa knees
An give plenny respeck to God yoa Boss,
An live an work ony fo him.’-”
9Den da Devil take Jesus to Jerusalem an make him stand on top da high part a da tower on top da temple. Da Devil say, “So, wat? You God's Boy fo real kine? Kay den, go jump down dea. 10Cuz da Bible say,
‘God goin tell his angel messenja guys
Fo take care you real good.
11Dey goin bring you down wit dea hands,
So yoa feet no hit da rocks.’-”
12But Jesus tell him, “Da Bible say, ‘God, he yoa Boss. So no try presha him fo make him prove dat he God.’-”
13Wen da Devil was pau trying fo make him do all kine bad stuff, he go way from him till nex time.
Jesus Start fo Teach Galilee Side
(Matthew 4:12-17; Mark 1:14-15)
14Den Jesus wen go back Galilee side, wit plenny power from God's Spesho Spirit. All da peopo ova dea in dat place wen hear all da stuff he wen do. 15He wen teach inside da Jewish churches, an everybody wen talk good bout him.
Da Nazaret Peopo, Dey No Mo Respeck Fo Jesus
(Matthew 13:53-58; Mark 6:1-6; Isaiah 61:1-2, 58:6)
16Jesus go Nazaret town, wea he wen grow up small kid time. Wen da Rest Day wen come, he go inside da Jewish church, jalike he every time go. He wen stand up fo read da Bible. 17Da helpa guy wen give him da book from Isaiah, da guy dat wen talk fo God befo time. He open um an find da place wea Isaiah wen write,
18“Da Spesho Spirit from da Boss stay in charge a me,
Dass why he wen send me fo teach da peopo dat no mo notting
Da Good Kine Stuff From God.
He wen send me fo tell da prisona guys
Dey can go free now.
An tell da peopo dat no can see,
Dey goin can see now,
An tell da peopo dat da odda guys make any kine to dem,
Dey no goin suffa no moa,
19He wen send me fo tell peopo da time wen da Boss Up Dea In Da Sky
Goin do spesho tings fo dem.”
20Jesus wen close da book, an give um back to da helpa guy, an sit down. All da peopo inside da Jewish church wen look at him. 21He say, “Wat you guys jus wen hear from da Bible, stay coming true right now.”
22Everybody dat wen hear him wen talk good bout him. Wen blow dea minds cuz he talk good. Dey say, “Eh, dis Joseph's boy, yeah?”
23Jesus say, “Fo shua you goin tell me wat our ancesta guys wen say, ‘Eh Docta! Make yoaself come good! Do da same ting ova hea in yoa own home town, jalike we hear you wen do inside Capernaum.’ 24Dass how you guys stay! But I telling you, ‘One guy dat talk fo God, he no mo no respeck inside his own town.’ 25Tink! Dass true dat befo time, wen Elijah stay alive, had plenny widows inside Israel an neva had rain from da sky fo three an one half years, an neva had food all ova da land. 26But God neva send Elijah fo help one widow inside Israel dat time. He wen send um fo help one widow inside Zarefat town, Sidon side. 27Same ting, wen Elisha was da talka fo God, had plenny lepa guys inside Israel. But God neva make one lepa guy inside Israel come good, dat time. Ony Naaman, da foreigna guy from Syria, God wen make him come good.”
28All da peopo inside da Jewish church wen come real huhu wen dey wen hear him talk good bout da foreigna guys. 29Dey wen stand up, drag him outside da town, an take him on top da hill wea da town stay, fo throw him ova da cliff. 30But he wen walk right thru all da peopo an go way from dea.
Jesus Make One Bad Kine Spirit Let Go One Guy
(Mark 1:21-28)
31Den Jesus go Capernaum town, Galilee side. He wen teach da peopo on da Jewish Rest Day. 32Wen blow dea minds, fo wat he teach um. Cuz he teach wit plenny power. 33Had one guy inside da Jewish church wit one bad kine spirit dat wen take ova him. He wen yell, 34“Whoa! You Jesus from Nazaret! Wat you like do to us spirits? Why you wen come ova hea? Fo kill us? I know who you! You da Good an Spesho Guy from God!”
35Jesus wen scold him. “Shut yoa mout! Let da guy go!” Den da bad kine spirit wen shake up da guy plenny in front dem, an wen let da guy go, an neva hurt him.
36Da peopo, wen blow dea minds. Dey tell each odda, “Eh! Wat dis? Wat kine new teaching dis? He get power fo even tell da bad kine spirits fo let go da peopo, an dey let um go!” 37An da peopo wen go all ova da place aroun dea fo tell everybody bout Jesus.
Jesus Make Plenny Peopo Come Good
(Matthew 8:14-17; Mark 1:29-34)
38Jesus wen go outside da Jewish church, an go inside Simon's house. Simon's mudda-in-law had high feva. Simon dem aks Jesus fo help her. 39Den Jesus go stand by her bed, an tell da feva fo get out. Da feva wen pau. Right den an dea she wen get up, an give dem food.
40Wen da sun wen go down an da Rest Day pau, plenny peopo wen bring by Jesus odda peopo dat get all kine sick. He wen put his hands on top everybody dass sick, an wen make all a dem come good. 41An da bad kine spirits wen let go plenny peopo. Da spirits wen yell, “You God's Boy!” Jesus wen scold da spirits, an neva let dem say notting, cuz dey wen know he da Spesho Guy God Wen Send.
Jesus Teach Inside Da Jewish Churches
(Mark 1:35-39)
42In da morning wen starting fo get light, Jesus go one place wea neva have nobody. Da peopo wen go look fo him, an wen dey find him, dey wen try fo make him stay wit dem. 43But he say, “I gotta go da odda towns too, fo teach da peopo da Good Stuff bout how dey can get God fo dea King, cuz dass why he wen send me.”
44So he wen teach inside all da Jewish churches all ova Judea side.