Dey Give Jesus Hard Time Bout Da Rest Day
One time, was da Jewish Rest Day. Jesus an his guys wen walk thru da fields wea dey grow da wheat. His guys wen pick litto bit wheat, rub um wit dea hands fo get rid a da junks, an eat um.
But had some Pharisee guys wen say, “Hala! How come you guys doing da kine work you not suppose to do on da Rest Day?!”
Jesus tell um, “Wot! You guys neva read inside da Bible wat King David wen do, dat time him an his guys was hungry?
He wen go inside God's house. He take da bread dass spesho fo God dat stay ova dea, an eat um, an give um to his guys too. An nobody eva say notting, no matta God's Rules say, ony da pries guys can eat dat bread.
“Eh! I da Guy Dass Fo Real. Dass why I da One dat get da right fo say wat can do da Rest Day.”
Jesus Make One Guy Come Good On Da Rest Day
One nodda Rest Day Jesus wen go inside one Jewish church an teach. One guy stay dea an his right hand stay funny kine.
Some teachas dat teach God's Rules an some Pharisee guys wen like bus Jesus, so dey watch um real good, if he goin make somebody come good on da Rest Day.
But Jesus wen know wat dey tinking, an he wen tell da guy wit da funny kine hand, “Get up an stand up ova hea in front everybody.” An da guy come.
Den Jesus wen tell dem, “I like aks you guys one question. Dass right in God's Rules fo do da good kine stuff on da Rest Day, o da bad kine? Fo help peopo fo stay alive, o fo wipe um out?”
He wen look aroun at dem, an den he tell da guy, “Stick out yoa hand.” An da guy stick um out, an his hand wen come good again.
But da Pharisee guys wen come real huhu, an wen start fo make plan togedda wat dey like do to Jesus.
Dat time Jesus wen go up one hill fo pray. He stay dea an pray all nite.
Wen day time come he call all dem dat go wit him fo come. An he wen pick twelve guys, an say dey da guys he goin send all ova.
Simon (da guy he wen name Peter),
Andrew his brudda,
James an John,
Philip an Bartolomew,
Alfeus's boy James,
Simon da guy dey call da Jewish sovereignty guy,
Judas Iscariot, da guy dat bumbye goin set Jesus up fo mahke.
Jesus Teach An Make Peopo Come Good
Jesus wen come down da hill wit his guys, an he stand on top one flat place. Had plenny guys dea dat wen go wit him an plenny odda peopo from Jerusalem an all ova Judea, an from Tyre an Sidon, two towns dat stay near da ocean.
Dey wen come ova dea fo lissen to him, an so he can make um come good from all kine sick. Da kine wit da bad kine spirits dat bodda dem, Jesus wen make um all come good.
Everybody wen try fo touch him, cuz da power was coming outa him an make um all come good.
Da Peopo Dat Stay Good Inside An Da Peopo Dat Stay Sad
20Jesus wen look da guys he teaching an say,
“You guys dat no mo notting now,
Cuz God, he yoa King!
“You guys dat stay hungry now,
Cuz you goin come full!
“You guys dat cry now,
Cuz you goin laugh!
‘You guys can stay good inside wen da peopo hate you, an throw you out, an talk bad to you, an say you no good cuz a me, da Guy Dass Fo Real!
Da peopo dat hate you guys now, long time ago God wen send his talka guys fo teach dea ancesta guys, an dose peopo dat time wen make God's talka guys suffa plenny too, jalike nowdays dea kids stay make you guys suffa. But eh! Go dance an sing wen dey make any kine to you guys, an stay plenny good inside! Cuz bumbye God goin have plenny good kine stuff in da sky fo you guys.
“Auwe you guys dat stay rich now!
Auwe you guys dat stay full now!
Auwe you guys dat laugh now!
“Auwe wen everybody talk good bout you guys! Cuz you know, dea ancesta guys wen talk good bout da fake guys long time ago dat wen say dey talk fo God but dey neva.”
Get Love an Aloha fo da Peopo Dat Stay Agains You
“I telling you guys dat hear me, get love an aloha fo da peopo dat stay agains you. Do good stuff fo dem.
Aks God fo do good tings to da peopo dat put kahuna on top you, an pray fo da peopo dat make you guys suffa.
If one guy hit yoa right cheek, let him hit yoa left cheek too. If one guy steal yoa coat, give him yoa shirt too.
Give to everybody who aks you fo someting, an if one guy rip off yoa stuffs, no tell him fo give um back.
Do to da odda guy jalike you like him do to you.
“If you guys ony get love an aloha fo da peopo dat get love an aloha fo you, you tink God owe you money fo dat? No way! Even da bad kine guys get love an aloha fo da guys dat get love an aloha fo dem!
An if you guys ony do good to da peopo dat do good to you, you tink God owe you money fo dat? No way! Even da peopo dat do bad kine stuff do dat.
If you guys ony lend someting to da peopo you tink goin give um back, you tink God owe you money fo dat? Even da bad kine peopo lend stuff to da bad kine peopo, if dey tink dey goin get um all back.
No way! Get love an aloha fo da peopo dat stay agains you, an do um good, an lend um stuff, an no tink if you goin get um back! Cuz da God Dass Mo Importan Den All Da Odda Gods, he everytime do good to da peopo dat no tank him an da peopo dat do real bad kine stuff. If you make like God, dat show dat he you guys Fadda, an you his kids. An bumbye, God goin have plenny good kine stuff bumbye in da sky fo you guys cuz a dat.
Give chance jalike yoa Fadda give chance.
No Make Like One Judge To da Odda Guy
“No make like one judge to nobody, an God no goin be yoa judge. No say da odda guy gotta be punish, an God no goin punish you. Let da odda guy go, an no stay huhu wit him. Den God goin let you go an hemo yoa shame fo all da bad kine stuff you wen do.
Give to da odda guy, an God goin give to you. He goin fill um up, shake um, fill um up some moa, plenny goin even run ova, an he goin pour um all inside yoa bag. Cuz da way you give, same way he goin give to you.”
Jesus talk some moa. He say, “You tink one blind guy can lead anodda blind guy? He do dat, an dey both goin fall down inside one puka.
One guy not mo importan den his teacha, but everybody dat learn all da stuffs from dea teacha, dey goin come jalike dea teacha.
“How come you guys spock da small piece junk inside yoa brudda's eye, an no tink bout da big two by four inside yoa own eye?
How you goin tell yoa brudda, ‘Eh, try let me pull da small piece junk outa yoa eye,’ wen you no see da big two by four inside yoa own eye? You say one ting an do anodda! First take da big two by four outa yoa own eye, den you can see good fo take da small piece junk outa yoa brudda's eye.
“Da good kine tree no can give bad fruit, an da bad kine tree no can give good fruit.
You know da kine tree from da kine fruit dey give. No can pick da fig o da grape from da kine tree wit kuku.
Da good guy do good kine stuff from da good stuff inside his heart, an da bad guy do bad kine stuff from da bad stuff inside his heart. Da kine stuff inside da heart goin come out thru da mout by wat da guy say.
“How come you guys call me ‘Boss, boss,’ but you no do wat I say?
I goin show you guys how da guy stay dat come by me, an hear wat I say, an do um.
He jalike da guy dat stay build his house, an dig deep an put da foundation on top da rock. Den da big water come, an pound da house, but no can shake um, cuz he wen make um good.
But da guy dat hear wat I say an no do um, he jalike da guy dat build his house on top da groun, but no mo foundation. Da big water pound um, an dat house fall down an bus up.”