Dey wen go thru Amfipolis an Apollonia, an wen come Tessalonika. Had one Jewish church ova dea.
Paul wen go da Jewish church, jalike he everytime wen go. Fo three week on da Rest Day he wen talk to dem bout da Bible.
He wen teach um an show um dat da Spesho Guy God Wen Send gotta suffa an come back alive from mahke. He say, “Dis guy Jesus I stay tell you guys bout, he da Spesho Guy God Wen Send.”
Some a da Jewish peopo wen trus wat he say, an wen go wit Paul an Silas. An plenny guys dat not Jewish dat get plenny respeck fo God, an plenny wahines dat stay importan, dey wen trus da Good Stuff Bout Jesus too.
But da Jewish guys wen come jealous. So dey wen get togedda some bad kine guys from da market place, an dey wen come one big gang, an wen start one big beef inside da town. Dey wen run by one guy name Jason's house fo look fo Paul an Silas so dey can bring um outside by da peopo.
But dey no can find um. Az why dey wen drag Jason an some odda bruddas in front da town leadas. Dey wen yell, “Dese guys, dey wen make big trouble all ova da whole world, an now dey stay come ova hea.
Dis guy Jason wen tell dem fo make house his place. An dey all stay broke King Cesar's rules, cuz dey say get one nodda King, one guy name Jesus.”
Wen dey hear dat, all da peopo an da town leadas, wen bodda dem plenny.
Den dey wen make Jason an da odda guys pay some money, an dey wen let um go.
Dat nite da bruddas wen send Paul an Silas away to Berea. Wen dey wen come ova dea, dey wen go da Jewish church.
Da Berea peopo, dey mo betta den da Tessalonika peopo, cuz dey wen like take in da Good Stuff Bout Jesus, an dey wen check out wat da Bible wen say from befo time, every day, fo find out if wat Paul wen say stay true.
Plenny Jewish peopo, an plenny wahines dat not Jewish dat stay importan, an plenny guys dat not Jewish, dey all wen trus da Good Stuff Bout Jesus.
Wen da Jewish guys inside Tessalonika wen know dat Paul stay teach wat God say inside Berea, dey wen go ova dea too, an dey wen make plenny peopo like beef.
Da bruddas wen send Paul da coast side fast, but Silas an Timoty wen stay inside Berea.
Da guys dat wen go wit Paul wen take him to Athens. Den dey wen go back an wen tell Silas an Timoty fo go by Paul fast.
Paul wen wait fo dem inside Athens, an he wen bum out wen he wen see had plenny idol kine gods ova dea.
He wen go da Jewish church an wen talk wit da Jewish peopo bout da Good Stuff, an da Greek peopo dat had plenny respeck fo God, he wen talk wit dem too. An, he wen go da market place every day an talk to da peopo dat stay come dea.
Some teachas dat tink like da guy Epicureas an odda teachas dat tink like da Stoic guys, dey wen come fo talk wit Paul. Some a dem wen say, “Wat dis mynah bird guy trying fo say?” Odda guys wen say, “Sound like he telling bout odda peopo's gods.” Dey wen say, dat cuz Paul stay teaching da Good Stuff Bout Jesus, an telling peopo dat Jesus wen come back alive from mahke.
Den dey wen take Paul in front da leada guys dat stay come togedda on top Ares Hill. Dey say, “Tell us bout dis new kine stuff you stay teach.
You stay tell us some stuff we no can figga, an we like know wat dat mean.”
(You know, all da peopo from Athens an da peopo from odda places dat stay dea, dey everytime talk bout an lissen to da new kine stuff. Dass all dey do.)
Paul wen stand up in da middle a dem guys on top Ares Hill, an say, “You guys from Athens, I see dat you guys everytime do da religious kine stuff.
Cuz wen I wen walk aroun an see all da places wea you guys go down an pray, I even wen find one altar place dat get one writing on top um dat say, ‘Fo Da God We Donno.’ Now I goin tell you bout da god dat you go down an pray to, dat you donno.
Da God dat wen make da world an all da stuff inside um, he da Boss fo da sky an da earth. He no stay inside da temples da peopo make.
Peopo no need take care him jalike if he stay need someting. Cuz he da One dat stay make all da peopo alive, an he give dem air fo breathe, an all da odda stuff.
From one guy, God wen make all da peopos, so dey can stay all ova da world. He wen make da times an da places fo dem fo stay.
God wen do dat so da peopo can go look fo him. Den might be dey goin reach out an find him. But he no stay far from every one a us guys.
‘Cuz a him we stay an move an do everyting.’
Jalike yoa own poet guys wen say,
‘We stay his kids.’
Cuz we stay his kids, no good if we tink dat God stay jalike one idol kine god dat one guy wen tink bout an make from gold o silva o one stone.
Befo time God wen let da peopo tink dat stuff, cuz dey neva know, but now he stay tell all da peopo all ova da world dat dey gotta come sorry fo all da bad kine stuff dey wen do, an pau do um.
He wen make one day wen he goin judge everybody inside da world. He goin send one guy fo judge um da right way. He wen show dat dis stay true cuz he wen bring dat guy back alive from mahke.”
Wen dey wen hear him say dat one guy wen come back alive from mahke, some a dem guys wen make fun a him. But odda guys say, “We like hear you talk bout dis stuff one mo time.”
Den Paul wen go way from da main leadas.
Some guys wen go wit Paul an trus da Good Stuff Bout Jesus. One a dem guys name Dionysius, he wen stay one leada guy, an one wahine name Damaris, an odda peopo, dey wen trus Jesus.