Wen da Day Numba Fifty afta Passova wen come, da one dey name Pentecost, all da peopo dat trus Jesus wen stay togedda in one place.
Right den an dea one noise wen come down from da sky jalike one strong wind, an make big noise all ova da house wea dey stay sitting.
Den dey see wat look jalike small kine fire dat wen stay right ova every guy.
God's Spesho Spirit wen take charge a dem, an dey wen start fo talk wit plenny odda kine languages, cuz God's Spirit wen make um so dey can.
Had Jewish peopo dat had plenny respeck fo God from all da countries in da world, staying inside Jerusalem dat time.
Wen dey hear dat noise, plenny peopo come togedda, an dey was all shock, cuz every guy wen hear dem telling stuff in his own kine talk.
Wen blow dea minds, an make dem tink plenny. An dey wen tell, “Eh! Da guys dat stay talking, dey from Galilee, yeah?
Den how come us guys stay hear dem telling stuff wit our own kine talk?
We come from all ova da place -- from Partia, Medea, Elam, Mesopotamia, Judea, Cappadocia, Pontus, Asia,
Frygia, Pamfylia, Egypt, Libya near Cyrene, an some guys from Rome.
Get Jews, an guys dat wen trus God an come jalike one Jew. Get peopo from Crete an Arabia. An still yet, we all hear dem telling da awesome stuff God do, wit our own kine talk!”
Wen blow dea minds, an dey no can figga, an dey wen tell each odda, “Eh, wat dis mean?”
But had odda guys dat wen make fun a dem an say, “Eh, dese guys, dey drunk!”
(Rules 32:5; 2 Samuel 7:12-13, 22:6; 1 Kings 2:10
; Songs 16:8-11, 18:4, 78:8, 110:1, 116:3, 132:11; Isaiah 57:19
; Joel 2:28-32)
Den Peter wen stand up wit da odda eleven guys, an wen tell da peopo wit one big voice, “My bruddas an sistas, all you Jewish peopo dat stay inside Jerusalem, lissen! I like tell you guys wat mean dis stuff dass happening.
Dese guys, dey not drunk jalike you tinking. Ony stay nine clock in da morning.
Dis wat Joel wen tell, da guy dat wen talk fo God long time ago,
‘Dis wat I goin do in da last days,
I goin make my Spirit take charge a all da peopo.
Yeah, an dat time too, I goin make my Spirit
I goin show awesome stuff up dea in da sky,
Goin get blood an fire an big kine smoke clouds.
Dat goin happen
An den, everybody dat know who da Boss fo real kine
“Eh, you guys from Israel ohana, lissen! I like tell you bout Jesus, da guy from Nazaret town. God wen show dat Jesus fo real, cuz God wen give him power, an he wen do all kine awesome stuff dat show who him. An you guys know dis fo real, cuz he wen do um ova hea by you guys.
God wen plan um long time ago, cuz he wen know dey goin give Jesus ova to you guys. An you guys wen take him an let da bad kine guys kill him on top one cross.
But God wen make him come back alive again from mahke. He no need suffa an mahke again, cuz a wat God wen do. He no can stay mahke, cuz he mo strong.
David wen say dis bout him:
‘I wen spock da Boss.
He stay close by my right side.
So I stay real good inside,
No matta I goin mahke, I know I can rest an wait fo God,
Cuz God, you no goin let me stay inside Hell,
You wen teach me how fo do,
You goin make me stay real good inside,
“Bruddas an sistas, good I tell you guys fo real kine dat da leada fo our ohana, David, he wen mahke, an dey wen bury him, an his grave stay hea still yet.
David was one guy dat wen talk fo God, an wen know dat God wen promise dis: ‘Bumbye I goin make one from yoa ohana king jalike you.’
David wen know wat God goin do. He wen say dat da Spesho Guy God Send goin come back alive again. He no goin stay inside Hell, an he no goin rot.
God wen make Jesus come alive again, an we all wen see him an tell bout him.
God wen put him in da mos importan place by his right side, an he wen get God's Spesho Spirit, da One God wen promise. He wen make his Spirit take charge a us guys too, an dass wat you see an hear now.
Cuz David neva go up in da sky, but he wen say,
‘Da Boss wen tell my Boss:
“Come ova hea, sit down!
Bumbye I goin make da peopo dat go agains you
“So, lissen! All da Israel peopo gotta know dis fo shua: You guys wen kill dis guy Jesus on top one cross, but God wen make him da Boss, an he da Spesho Guy God Wen Send.”
Wen da peopo hear dat, dea heart come sore, an dey tell Peter an da odda guys Jesus wen send all ova, “Bruddas, wat we goin do?”
Peter tell dem, “Every one a you guys gotta come sorry an stop doing all da bad kine stuff you stay do, an get baptize fo show you Jesus guys. He da Spesho Guy God Wen Send. Den he goin let you guys go, an hemo yoa shame fo all dat bad kine stuff, an he goin give you his Spesho Spirit.
He wen promise all dat fo you guys an yoa kids, an fo all da peopo dat no stay tight wit God -- all da ones da Boss our God goin tell fo come to him.”
Peter wen tell dem plenny mo stuff, an beg um, “Let God take you outa da bad kine stuff dat da odda peopo stay doing now.”
Had bout three tousand peopo dat wen trus wat he wen say, an wen get baptize. Den dey come togedda wit da odda peopo dat wen trus Jesus.
Dey wen stick wit all da stuff da guys dat Jesus wen send wen teach dem. An dey all wen stay togedda, an eat togedda, an wen pray.
Da guys Jesus wen send all ova, dey get power fo do plenny awesome stuff. Everybody stay scared, cuz dey get plenny respeck fo Jesus guys.
All da peopo dat wen trus Jesus wen stay togedda, an wen share all dea stuffs wit each odda.
Dey sell dea stuffs, an give da money to all da peopo dat need kokua.
Every day dey come togedda inside da temple yard. Dey broke da bread inside dea houses, an eat togedda da food. An dea heart wen stay good inside, an dey neva put on one ack.
Dey wen tank God an tell how good he stay. An all da peopo wen talk good bout dem. An every day da Boss wen bring odda peopo dat he wen take outa da bad kine stuff dey wen do.