Wen da big noise wen pau, Paul wen tell Jesus guys fo come by him. He wen kokua dem, an wen tell um aloha, an den wen go Macedonia.
He wen go thru Macedonia, an wen talk to da peopo ova dea an kokua dem. An den he wen go Greece side.
He wen stay ova dea three months. He stay ready fo sail Syria side, but da Jewish guys wen make plan fo kill him, so he wen go back thru Macedonia.
Sopater from Berea, Pyrrhus boy, an Aristarkus an Secundus from Tessalonika, Gaius from Derbe, Timoty, an Tykicus an Trofimus from Asia, dey all wen go wit him.
Dem guys wen go ahead an wen wait fo us inside Troas.
We wen sail from Philippi afta da spesho religious time fo da Bread Dat No Mo Yeast. Five days afta dat we wen go by da guys inside Troas, an we wen stay ova dea one week.
Da first day in da week we wen come togedda fo broke bread an eat fo rememba dat Jesus wen mahke. Den Paul wen teach da peopo. Cuz he wen like go way da nex day, he wen talk till da middle a da nite.
Had plenny lamps inside da place upstairs wea we wen stay.
One young guy name Eutykus wen sit by da window. He wen come sleepy wen Paul stay talk. Wen he wen sleep, he wen fall down on top da groun from three floors up. Dey wen pick um up, an jalike he mahke.
Paul wen go down dea, an throw himself on top da guy, an wen put his arms aroun him. He say, “No worry, he still stay alive!”
Den he wen go upstairs again, an wen broke da bread, an eat. He talk to dem till da sun wen come up, an den he wen go.
Da peopo wen take da young guy Eutykus home, an dey wen feel good inside cuz he alive.
Paul wen tell us guys fo go by da boat an sail aroun da poin to Assos, cuz he wen like walk ova dea.
He wen meet us Assos side, an he wen come inside da boat. An den we wen all go Mitylene.
Da nex day we wen sail from dea, an wen go Chios Island. Da nex day we wen cross ova to Samos Island, an da nex day we wen go Miletus town, da Asia mainland.
Paul wen tink fo go aroun Efesus. He no like stay Asia side, cuz he wen like go Jerusalem fo Pentecost Day, if he can make um.
From Miletus Paul wen send somebody fo tell da older church leada guys from Efesus fo come by him.
Wen dey wen come ova dea, he wen tell um, “You guys know how I stay all da time, from da first day I wen stay wit you guys Asia side.
I wen work fo da Boss Jesus wit good heart. An I was crying, cuz da Jewish guys wen make me suffa plenny, an wen try kill me.
You guys know I no stay scared fo teach you guys all da stuff dat goin kokua you. I wen teach you guys in front all da peopo, an inside yoa house.
I tell da Jewish peopo an da peopo dat not Jewish, dat dey gotta come by God, an come sorry an like pau all da bad kine stuff dey stay do, an no do um no moa, an dey gotta trus our Boss Jesus.
Now, God's Spesho Spirit stay telling me fo go Jerusalem. I donno wat goin happen to me ova dea.
I ony know dat God's Spesho Spirit been telling me dat I goin suffa an go jail every place I go.
But den, fo me, fo stay alive, dass notting. I ony like do everyting da Boss Jesus wen tell me fo do to da end. He wen tell me fo tell everybody da Good Stuff bout how plenny good tings God do fo us.
“I wen go all ova da place wea you guys stay, an wen tell you guys bout how bout how peopo can get God fo dea King. I know dat none a you guys goin eva see me any moa.
Dass why I stay tell you guys today dat nobody can blame me fo anodda guy if dat guy no trus God, an cut himself off from God,
cuz I no scared fo tell you guys all da stuff God like you guys fo do.
Watch out fo yoaself an fo all da peopo dat God's Spesho Spirit wen give you guys fo take care dem. You guys gotta take care da church guys jalike one sheep farma take care his sheeps. Cuz da Boss Jesus wen bleed an mahke fo make dem God's kids.
I know dat afta I go, some guys jalike wild dogs goin come by you guys fo try wipe you guys out.
Some a dem guys goin come from you guys. Dey goin change da true stuff fo take some peopo wit dem.
So watch out, you know! Rememba dat fo three years I neva stop telling all you guys day an nite bout dis stuff, an I even wen cry bout um.
“Now, I give you guys ova to God, an I tell you fo lissen to wat God say bout how he like do good tings fo peopo. All dat can make you guys come strong inside an give you guys all da good stuff God get fo all his kids. Dey stay spesho fo him.
I neva like get odda peopo's silva o gold o clotheses.
You guys know dat I wen work fo all da stuff me an my friends need.
I do all dat fo show you guys dat by dis kine hard work we gotta help da guys dat no stay strong inside. I rememba wat da Boss Jesus wen say, ‘Da guy who give, he stay mo good inside den da guy who get.’
Wen he say dat, he wen go down on his knees wit all dem guys an wen pray.
Dey all cry an dey wen hug him an kiss him bye.
Dey was mo sad cuz he wen say dey no goin see him no moa. An dey wen go wit him to da boat.