How Fo Get Um Right Wit God
31Kay den, bruddas an sistas. Stay good inside, cuz you guys stay tight wit da Boss! Da kine stuff I telling you guys inside dis letta, dat fo help you guys fo stay outa trouble, an dat no make bodderation fo me fo tell you guys dat one mo time.
2Eh! Watch out da kine peopo dat ack pilau kine! Dey da kine peopo dat everytime do bad kine stuff. Dass da kine peopo dat say you gotta knife up da body. 3Dey tell, “Fo be God's guy fo real kine, gotta cut skin.” But you know, us guys, we da guys dat get God's Spirit. Dass jalike da mark fo show dat we God's guys fo real kine, not dem. Cuz wen we do stuff fo God, da Spirit help us do um, dass why. Us guys can feel real proud cuz we stay tight wit God's Spesho Guy, Jesus Christ. We no tink we okay jus cuz somebody wen do someting to our body.
4Now me, if I like, I can tink I okay cuz a who me, an wat I wen do, but no need. If da odda guys figga dey can trus dat stuff, I figga I get plenny mo fo trus den dem guys. Lissen up! 5Dey wen cut skin on me one week afta I born. I from da Israel peopo, from da Benjamin ohana. I hundred percent one Hebrew guy. I wen work real hard fo do everyting God's Rules say, jalike da Pharisee guys teach um. 6I wen go all out fo make da church peopo suffa plenny. If you figga can get um right wit God if you do jalike God's Rules say, I do all dat awready. No can poin finga me an say I neva.
7But you know wat? No matta I wen figga all dat stuff do me plenny good, now, I figga all dat stuff ony junk! Cuz I stay tight wit Christ now, dass why. 8Mo den dat, jalike I wen say, now I figga everyting ony junk. Cuz now, I know my Boss Jesus Christ fo real kine, an dass mo betta! I wen lose everyting cuz I his guy, you know. An I figga, all dat kine ony rubbish! Cuz I like come real tight wit Christ. 9I like everybody know dat I stay tight wit Christ. I do wat God's Rules say, but dat no make me get um right wit God. I get um right wit him cuz I trus Christ, dass why! Dat way, wen I trus him, God da One dat wen make me come right wit him.
10Main ting, I like know Christ to da max. He wen come back alive afta he wen mahke, an he get plenny power. I like him make dat power work inside me. Wen I suffa cuz I Christ's guy, I like handle um jalike him. I like come jalike Christ, so wen I go mahke, I goin handle um jalike him. 11So den if can, I figga, bumbye afta I mahke, God goin let me come back alive.
I Like Win Da Race
12I not saying dat I wen win da race awready. I not perfeck yet. Mo like I go all out, cuz I like da medal fo come mines. Jesus Christ make me come his guy awready. Dass why I go all out fo win. 13Eh, bruddas an sistas! I know dat da medal not mines yet. But I doing da main ting so I can get um -- I not even tinking bout all da stuff dat wen happen awready. I going fo broke fo da stuff dat goin happen bumbye. 14I running all out fo win da race. An you know wat kine medal I goin get fo dat? Dis: God goin tell me, “Eh! Come up hea by me!” An I going dea cuz a Jesus Christ, dass why.
15You know, all us guys dat stay grown up an solid inside, good we all tink an feel da same way. If you guys tink diffren, God goin show you how you suppose to tink. 16You guys doing okay, so stick wit da stuff you know an stay do um.
17Eh, bruddas an sistas! Help each odda fo ack how I ack. Get odda guys dat do jalike I do. Check out dem guys too. You guys get all us guys fo copy, so you guys can do jalike we do. 18But eh! Jalike I wen tell you guys ova an ova awready, an even now I stay crying wen I telling you guys dis: Get plenny guys dat stay agains Christ, an dey no can take dat he wen mahke on top da cross. 19Dem guys, bumbye dey goin wipe out. Dey ony live fo eat. Everytime dey do shame kine stuff, an dey figga dey so hot stuff wen dey make lidat. Dey da guys dat ony like tink bout da kine stuff from dis world.
20But us guys, we get our own place wit God inside da sky. Dass wea our Boss Jesus Christ stay. We stay waiting fo him come back from dea, cuz he da guy dat goin take us outa da bad kine stuff we stay in. 21He goin make our bodies come real diffren, no matta our bodies stay kinda junk kine right now. Christ, his body wen come real awesome, an he goin make us come jalike him. He can do dat, cuz he get da power fo take ova everyting.