So den, wat bout us guys? All dose peopo dat wen trus God befo time, jalike dey all wen run one race. An now, jalike dey all stay standing aroun us, watching us run da race, an showing us how fo do um. So we gotta hemo all da stuff dat make us run slow, you know, da bad kine stuff dat jam us all up. We gotta hang in dea an finish da race dat God wen pick fo us.
Da whole time us guys running da race, we ony stay looking at one guy, dass Jesus. He da One dat wen help us start trussing God, an he help us trus God all da way. Wen he wen suffa on top da cross, he wen hang in dea, an neva bodda him dat dey wen make him shame. He do dat cuz he know dat bumbye he goin stay real good inside. An in da end, he sit down in da mos importan place, by God's throne, on da right side.
So tink plenny bout Jesus! How he wen hang in dea an wen put up wit all kine bad stuff from all da bad peopo who wen give him hard time. If you guys tink bout Jesus lidat, den you guys no goin get tired an lose fight.
Eh! You guys stay fighting agains da bad kine stuff, yeah? But still yet you guys no fight so dat you guys mahke.
You guys wen foget awready dat God wen give you guys good kine words inside da Bible, an dat he talk to you guys jalike one fadda talk to his kids? He say,
“My boy, no tink dass notting
An no give up wen he tell you dat you wen go do wrong,
He make presha fo make you learn stuff.
Jalike he give um hard time wen he teach um.”
Hang in dea wen God make presha fo make you guys learn stuff. God make lidat to you guys, cuz you his kids. An every fadda guy make presha fo make his kids learn stuff.
Everybody get dat kine presha from dea fadda. If yoa fadda no make presha fo make you guys learn stuff, dat mean you not his kids fo real kine, an no mo nobody fo make jalike one fadda fo you guys.
You know, all us guys wen get our real faddas fo make presha fo make us guys learn stuff, an cuz a dat, we get respeck fo dem. So den even mo, we gotta lissen to God. He jalike our Fadda fo make us guys come alive inside. An den we goin live fo real kine!
Our fadda guys wen make presha fo make us guys learn stuff fo litto wile, an dey do um da way dey tink az good fo us. But God, he do um cuz he know fo real kine wass goin help us. Dass why he make presha fo make us guys learn stuff, so dat we come good an spesho jalike him.
Everytime we get presha fo make us guys learn stuff, we come all sore inside, an dat kine we no like. But bumbye all dat stuff goin make us come mo strong fo do da right ting, an den we goin rest inside.
Eh you guys! Jalike da Bible wen say, “No matta yoa hands stay hanging down loose an yoa knees feel all funny kine! Bite hard!”
An, “Make da way wea you going stay strait fo yoa feet,” so you can come strong inside. Jalike if you no can walk good, you take care, an bumbye yet you goin come good.
14Try everytime fo make good wit everybody, an everytime be good an spesho fo God da way you live. Cuz ony da peopo dat go all out fo stay spesho fo da Boss goin see him fo real kine.
Watch out how you stay. No good if get somebody dat no take in all da good kine stuff dat God like do fo us, cuz dat goin make plenny odda peopo come pilau inside. Dass jalike wen get some bad kine plant dat grow wild an make all da odda plants go poho.
No good if get peopo dat ony like fool aroun, o if get peopo dat ack jalike God no matta, jalike da guy Esau wen ack befo time. He Isaac's boy dat wen born first, so he get da right fo get da bestes stuff bumbye wen his fadda mahke. But den, he wen let go da right fo one bowl soup!
An you guys rememba dat bumbye, wen Esau like his fadda give him da right fo be da leada fo dea ohana, an tell him dat God goin do good tings fo him, his fadda no can, no matta Esau wen cry plenny. Cuz Esau no can change da ting he wen do befo.
But da way God wen make da new deal fo you guys, not jalike da way he wen make da first deal. Cuz dat time, da Israel peopo wen come by one place dat dey can touch an feel. Dey wen come by Mount Sinai dat wen have burning fire an storm on top, an was real black an dark all aroun.
An you guys, you neva hear da trumpet noise, o da awesome voice, jalike da Israel peopo wen hear. Dat time dey wen beg Moses, “Auwe! We no like hear dat voice no moa!”
Dey no can handle, dass why. God wen tell um strait, “No let notting go on top da mountain! Nobody! Not even one animal! Gotta throw stones an kill um if dey go on top da mountain!”
Wat dey wen see was so scary, dat even Moses wen say, “Eh! I stay real scared inside! Dass why I stay shaking all ova!”
But you guys, wen God wen make da new deal fo us guys come tight wit him, jalike da time yoa ancesta guys wen go by him on top Zion Mountain wea he stay. An Zion Mountain, jalike da big town inside da sky wea da God da stay alive live, dass jalike Jerusalem Town. An jalike you guys go by uku paila angel guys dat wen come togedda fo party.
An jalike you guys wen come togedda wit God's kids. Dey all importan jalike da Fadda's numba one Boy. God get all dea names on top one spesho list inside da sky. An jalike you guys wen come togedda wit God, da Judge fo all da peopo inside da world. An jalike you guys go by da good peopo from befo time dat God wen make come perfeck.
An jalike you guys wen come togedda wit Jesus too. He da middle man fo da new deal God wen make. Was jalike Jesus blood wen make solid da promise fo da new deal, an dat deal, mo betta den had befo time wen da guy Abel wen bleed an mahke. Cuz Jesus wen bleed an mahke jalike one sacrifice, an dass wat make everyting happen fo da deal.
Eh, you guys! Make shua you guys lissen God, da One dass talking. Da Israel peopo, dey neva like lissen Moses. He da guy hea inside da world dat wen tell dem wat God wen say. But cuz dey neva lissen, God wen punish dem. Dat mean, even mo us guys, we goin get it, if we no lissen da One from da sky wen he talking to us!
Dat time was God's voice dat wen make da earth shake. But now, he wen make promise. He say, “One mo time I goin make da earth shake, an I goin make da sky shake too.”
Wen God say, “One mo time,” he mean, da stuff God wen make befo time, he goin shake um, an den he goin take um away. Den da stuff dat no shake, ony dat stuff goin stay foeva.
So den, God goin give us guys da right fo come jalike kings wit him. An nobody eva goin take away dat right from us guys. So, we gotta tell God “Mahalo plenny.” Wen we do dat, we show him all kine love an respeck, cuz we know how plenny awesome he stay.
You know, jalike da Bible wen say, “Our God, he jalike one fire dat eat up everyting.”