Den da angel guy show me da river wit da water dat make peopo come alive fo real kine. You can see thru da river, jalike da crystal. Da river go from da throne wea God an God's Baby Sheep Guy stay,
down da middle a da main street inside God's big town. On two side a da river da tree stand dat make peopo come alive fo real kine. Da tree give fruit every month, twelve time all togedda every year. Da leaf from da tree make all da diffren peopos all ova da world come good.
No mo nobody goin make kahuna no moa. Da throne wea God an God's Baby Sheep Guy sit goin stay inside da town, an all God's worka guys goin work fo him.
God's worka guys goin see his face, an dey goin get God's name on top dea forehead.
No goin get no nite time no moa. Dey no goin need da light from da lamp o da light from da sun, cuz God, da Boss, he goin give dem light. An dey goin be in charge a da world wit God da King foeva.
6Da angel tell me, “Dis I telling you stay true, an you can trus um fo shua. God, da Boss, send his Spirit fo tell da guys dat talk fo him wat fo say. An he wen send his angel messenja guy fo show his worka guys da stuff dat gotta happen pretty soon.”
Jesus say, “Eh, lissen! I coming back real soon! Everybody dat stick wit wat God say inside dis book goin stay good inside.”
Me, John, I da guy wen hear an see all dis stuff. Afta I wen hear an see dat, I wen go down in front da angel guy dat wen show um to me, fo show love an respeck to him.
But he tell me, “Nah! No do dat! I ony one worka guy jalike you an yoa bruddas dat talk fo God, an everybody dat stick wit wat dis book say. Mo betta, ony give love an respeck to God!”
Den da angel tell me, “No close up dis book an put seal on top, cuz den nobody can read um. Almos time now.
So whoeva like do da wrong kine stuff, let um stay do da wrong kine stuff. Whoeva like do pilau kine stuff, let um stay do pilau kine stuff. Whoeva like do da right kine stuff, let um stay do da right kine stuff. An whoeva stay spesho fo God, let um stay spesho fo God.”
Jesus say, “Eh, lissen! I coming back real soon! An I goin bring wit me da stuff fo give back to everybody fo everyting dey wen do.
I da first one from befo, an da last, da start an da end, A an Z.
“Everybody dat wash dea clotheses clean, dey can stay good inside, cuz dey get da right fo eat from da tree dat make peopo alive fo real kine. An dey can go inside God's big town thru da gate.
Outside da town get da peopo dat dey jalike dogs, da peopo dat make kahuna, da peopo dat fool aroun, da peopo dat like kill oddas, da peopo dat go down an pray to da idol kine gods, an everybody dat love fo bulai.
“Me, I Jesus. I wen send my angel messenja guy fo tell you guys inside da churches dis stuff. I come from David's ohana. I jalike da plant dat come up from da root. I jalike da bright Morning Star.
Bumbye da peopo dat stay spesho fo God goin come togedda wit me, jalike wen one wahine marry one guy. So God's Spesho Spirit an God's peopo, dey tell, ‘Try come!’ Everybody dat hear dat, say ‘Try come!’ too. Whoeva stay thirsty let um come, an whoeva like, let um take da water dat make um come alive fo real kine, an no goin cost dem notting.”
I tell everybody dat hear wat God say inside dis book: You guys betta not add notting to dis book. If anybody add someting, God goin give him all da big troubles God wen tell bout inside dis book.
An if anybody take away stuff dat God tell from dis book, God goin take away from him his share a da real kine life dat da tree give, an his place in da town dat stay spesho fo God, dat God wen tell bout inside dis book.
Da One dat tell all dis stuff say, “Yeah, I coming back real soon!”
Yeah, Boss! Come back real soon, Jesus!
I like all you guys know da good way our Boss Jesus make to you! Dass it!